ILOILO CITY- Nasiplatan sa Timor Leste ang pila ka mga himata ni anay Negros Oriental Representative Arnolfo “Arnie” Teves Jr.
Nakit-an nga pasakay sa isa ka private jet ang ginabanta anom ka mga himata sang anay kongresista kag padulong na sa Cambodia.
Matandaan nga si Teves ang gin-aresto sa Dili, Timor Leste sang nagligad nga bulan kag nagapabilin nga yara sa kustodiya sang Timor Leste police samtang ginahulat sang gobyerno sang Pilipinas ang ruling sang korte tuhoy sa pagkadakop sa iya.
Si Teves ang nagapangatubang sang multiple murder charges sa pagpatay kay Negros Oriental governor Roel Degamo kag iban pa sa puluy-an mismo sang anay gobernador sang Marso 4, 2023.
Magluwas sa pagpatay kay Degamo, si Teves ang ginkasuhan man angot sa kamatayon sang tatlo ka mga indibidwal sa Negros Oriental sang 2019.
Si Teves kag 12 ka iban pa ang gin-designar bilang mga terorista sang Anti-Terrorism Council.
Sang Pebrero, ginmando sang korte ang kanselasyon sang iya passport.
Siya ang napahalin sa House of Representatives sang Agusto 2023 bangud sa disorderly conduct kag malawig nga pag-absent apisar nga expired ang iya travel authority.
