Ginlunsar sang kaalyado sang mga Duterte ang isa ka koalisyon bilang panawagan suno sa ila para sa accountability kag pag-address sang mga kritikal nga mga isyu sa pungsod.
Ini amo ang Reform Alliance for Good Governance and Accountability ukon RAGE coalition nga ginabug-usan sang gintingob nga pwersa sang Partido Demokratiko Pilipino (PDP), Partido Reporma, kag Reform PH.
Ginapangunahan ni Davao City Mayor Baste Duterte, anak ni former President Rodrigo Duterte, ang amo nga koalisyon.
Lakip sa nagtambong sa launching amo sanday Senator Robin Padilla, Senator Bong Go, Batangas 1st District Rep. Leandro Leviste, former Executive Secretary Vic Rodriguez, former Press Secretary Trixie Cruz Angeles, kag SAGIP party-list Rep. Paolo Marcoleta.
Sa speech ni Padilla, ginpanindugan sini nga wala sang ano man nga pinakamaayo nga magpamuno sa Pilipinas kundi isa ka Duterte.
Nagpadala man sang audio message si Senator Bato dela Rosa.
Suno sa senador, bug-os tagipusuon sini nga ginasuportahan ang koalisyon para sa kamatuoran, accountability, kag para sa interes sang mga Pilipino.
Nahibaluan nga absent si Bato sa Senado halin sang Nobyembre 11, 2025 halin sang nagguwa ang huring-huring nga may warrant of arrest na ang ICC para sa iya.
Siya ang nagapanguna sa mga senador sa may pinakadamo nga pag-absent sa mga session sa plenaryo. 31 ka session days nga wala nagpakita si Bato apisar padayon ang iya baton sang sweldo.
