(c: WE ARE XANE FB PAGE)
ILOILO CITY – Indi lamang katahum kag abilidad ang ipakita sang onse ka mga kandidata sang Miss Iloilo 2020 kundi nagkalain-lain nga adbokasiya nga mahimo makabulig sa madamo nga tawo sa Iloilo.
Ini ang ginalakipan sang bulig sa mga mangunguma, equal gender rights, anti-bullying, edukasyon, pagduso sang responsable nga paggamit sang social media, anti-discrimination, child support, tupong nga kinamatarong, mental health, medical service, kag paghalong sa palibot.
Sa interview sang Bombo Radyo kay Rabiya Mateo, 23 anyos sang Balasan, Iloilo, iya ginpahayag nga luyag niya iduso ang maayo nga edukasyon para sa tanan bangud ini ang iya ini ginakabig nga ‘gateway to success’.
Si Mateo ang isa na ka Review Center lecturer sa Manila .
Suno kay Mateo, siya mismo ang nakaagi nga gin-abandona sang bata pa amo nga siya ang ginpadaku samtang nagaisahanon ang iya iloy.
Nagapati siya nga ini ang nagbulig sa iya nga mangin mas maisog pa gid sa pag-atubang sa mga kabudlayan, amo nga nangin full scholar siya sang college samtang naga part-time naman sa modeling.
Luyag man ni Mateo nga maintindihan pa gid sang publiko kon daw ano ka importante ang edukasyon.
Samtang, anti-bullying naman ang luyag iduso sang isa ka kandidata nga nakaagi bully sang siya ang gamay pa.
Sa interview sang Bombo Radyo sa half-Nigerian candidate nga si Tarilaye Figalan John Beke, 25 anyos sang Pavia, Iloilo, iya ginpahayag nga wala ginasuportahan sang mga Ilonggo ang anuman nga sahi sang pagbully kag ini amo ang sentro sang iya adbokasiya.
Suno kay Beke, nagapati siya nga ang iya personalidad amo ang pinasahi sa iya bangud apisar may lahi siya nga Nigerian, iya nakuha ang iya ginakabig ‘compassion kag sweetness’ sang mga Ilonggo.
