ILOILO CITY- Padayon nga ginasinggitan sang grupo sang mga mamumugon nga pamatian sang mga opisyal sang gobyerno ilabi na ang mga legislators nga magpasar sang layi nga nagapataas sang sweldo sang ordinaryo nga mga pumuluyo.
Sa interview sang Bombo Radyo kay Jose Jutada, myembro sang Bukludan ng Progresibong Mambubukid sa Pilipinas, iya ginpahayag nga tuman ka gamay gid ang minimum wage nga ginabaton sang mga mamumugon sa tunga sang nagatimbuok man nga inflation rate.
Suno kay Jutada, kun magapabungol- bungol lang ang mga mamalidha, wala gid sang alebyo sa estado sang mga mamumugon.
Nagpangabay man ini sa gobyerno nga balikdon ang mga pobre nga mga drivers nga madulaan sang trabaho bangud sa modernization program sang gobyerno.
Suno sa iya, tuman ka importante ang papel sang mga drivers sa sosyodad ilabi na sa pagpahulag sang ekonomiya gani kinahanglan nga hatagan sila sang nagakaigo nga igtalupangod kag mabuligan sa ila mga sitwasyon.
