ILOILO CITY – Handa na ang masobra sa 250 ka medical doctors, dentist, pharmacist kag medical volunteers para sa Bombo Medico 2019 nga patigayunon buwas, Hulyo 14, sa Iloilo Science and Technology University (ISATU) sa Burgos St. Lapaz, Iloilo City.
Ang Bombo Medico 2019 nga isa ka corporate social responsibility sang Bombo Radyo Philippines ang dululungan nga patigayunon sa mga lugar sa pungsod nga may yara sang Bombo Radyo kay Star FM Stations.
Ang Bombo Medico 2019 ang maga-umpisa 8:00 sa aga kag may katuyu-an nga makabulig sa mga pigado kag nagakinahanglan sang medical attention.
Lakip sa mga igatanyag nga libre nga medical kag dental services sa Bombo Medico 2019 amo ang tooth extraction ukon gabot sang ngipon, full kag partial dentures, libre nga eye glasses kag eye check-up, check-up para sa mga may balati-an sa ear, nose and throat (ENT), may pre-natal services kag cervical cancer screening.
May yara man sang igapanghatag nga bulong santo sa resulta sang sang medical check-up kag may igapanghatag man nga mga assistive device kasubong sang wheelchair, sungkod kag walker santo sa ginakinahanglan sang pasyente.
Magluwas sa medical kag dental services, may igatanyag man nga libre nga haircut ukon libre nga paggunting sang buhok, masahe kag iban pa.
Sa pag-abot sa venue, kinahanglan nga mag-una sa pagpila sa registration sa diin ang mga naka pre-register ang unahanon kag magpila sa pagpakuha sang vital signs kasubong blood pressure kag bug-at.
Pagkatapos, mahimo na nga magpila sa pagpa-check-up depende sa balati-an ukon kinahanglan nga medical attention.
Agud nga malikawan ang huol, ginapanugyan nga magpahuway kag magpabusog bag-o ang Bombo Medico 2019.
