ILOILO CITY – Napasakaan na sang kaso ang anom ka mga miyembro sang New People’s Army nga nagkaladakpan sa nagluntad nga engkwentro sa Sitio Anoy, Brgy. Cabalaunan, Miagao, Iloilo.
Sa interview sang Bombo Radyo kay Pol Capt. Joevito Bose, hepe sang Miagao Municipal Police Station iya ginpahayag nga na turn over naman sa Department of Social Welfare and Development ang lima ka mga menor de edad nga nagkaladakpan.
Suno kay Bose, igaturn over naman sang Miagao Municipal Police Station sa Regional Police Crime Laboratory ang mga narekober nga armas samtang sa Explosive Ordnance Disposal ang mga Improvised Explosive Device.
Samtang ginatan-aw naman sang 3rd Infantry Division sang Philippine Army nga epekto sang ginapatuman nga ceasefire ang sunod-sunod nga pagluntad sang engkwentro sa Panay sa diin una na diri ang sa banwa sang Lambunao nga nangin kabangdanan sang kamatayon sang isa ka miyembro sang Philippine Army lakip man ang sa banwa sang Miagao sang gintalikdan lang nga semana.
Sa interview sang Bombo Radyo kay Pol Capt Cenon Pancito III, tagapamaba sang 3rd Infantry Division sang Philippine Army ang ceasefire ang nagahatag sang kahigayunan sa mga miyembro sang New Peoples Army nga mag reorganize, magregroup kag magplano sang operasyon.
Dugang sang natungdan, dugangan naman sang 3rd Infantry Division ang ila nga pwersa agud mas mapasangkad ang ginapatigayon nila nga mga operasyon batok sa mga rebelde nga grupo.
