ILOILO CITY- Ginareklamo sang mga motorista ang madugay matapos nga construction sang drainage system sa Loboc, Lapuz, Iloilo City nga ginpalala pa sang pagbakbak sa dalan.
Sa interview sang Bombo Radyo kay Punong Barangay Pancho Vijuan, iya ginpahayag nga ginsuguran ang amo nga proyekto sang Hunyo 2023 kag natalana kuntani nga matapos sang Disyembre 2023.
Apang suno kay Vijuan, tubtob subong, padayon pa ang construction sang proyekto.
Pahayag ni Vijuan, sa tion sang peak hours, nagaginutok ang mga salakyan sa lugar bangud nga magtimbang nga bahin sang dalan ang indi pa maagyan bangud sa on-going construction.
Dugang niya, nagbug-at pa gid ang sitwasyon sa lugar bangud sa ginapatigayon man nga asphalt overlay kag ang pagbakbak sa mga porsyon sang dalan.
Nagalaum naman ang punong barangay nga matigayon nga matapos na ang mga proyekto agud magtawhay na ang sitwasyon sa area.
