Nagdangat na sa masobra 2,000 ang naaresto kasunod sang nagapadayon nga mga protesta sang pro-Palestinians sa college campuses sa lapta-lapta nga mga states sa Estados Unidos sang Amerika.
Nagsugod ini sang nagligad pa nga Abril 18 kun sa diin 46 ka beses na nga nagpang-aresto ang mga pulis bangud sa tuman nga gamo nga nagakatabo sa sulod sang mga buluthuan.
Nagluntad ini sa 36 ka mga eskwelahan lakip na ang 200 nga naaresto sang nagligad nga gab-i sa University of California, Los Angeles.
Nag-update naman ang New York Police Department nga sa 282 nila nga naaresto sa City University of New York kag Columbia University, nakit-an nga lapaw na ang mga edad sang iban ipaanggid sa kinaandan nga estudyante.
90 sa naaresto ang naga-edad na sang trentahon kag kuwarentahon samtang tatlo naman ang nagaedad na sang 50. Ang mga rason ngaa ginaaresto sila amo ang disorderly conduct, assault kag pagpangawat.
Nagpaguwa naman sang statement si US President Joe Biden nga nagapanawagan nga untaton ang pagpang-gamo.
“There is a right to protest, but not a right to cause chaos,” pahayag sini sa White House.“Destroying property is not a peaceful protest. It’s against the law. Vandalism, trespassing, breaking windows, shutting down campuses, forcing the cancelling of classes and graduations – none of this is a peaceful protest.”#
Photo: Associated Press
