ILOILO CITY- Nagpabutyag sang dako nga pagkahangawa ang iban nga nagasagod sang baboy sa Oton kasunod sang narecord nga kaso sang African Swine Fever sa Brgy. Bita Norte sa amo nga banwa.
Sa interview sang Bombo Radyo kay Leo Servidad, hog-raiser sa Bita Sur, iya ginpahayag nga ginakabalak-an niya nga madulaan siya sang palangabuhian sa tion nga magpositibo sa amo nga balatian ang iya mga baboy.
Suno sa iya, nakuhaan na sang blood sample ang iya mga baboy kag ginahulat nalang ang resulta.
Nagalaum naman ini nga negatibo sa African Swine Fever ang iya mga ginasagod nga sapat bangud matumbalay gid ang ila nga palangabuhian.
Nahibaluan nga masobra na sa 300 ang ginpatay nga baboy nga apektado sang African Swine Fever sa Oton.
