ILOILO CITY – Nagdangat na sa masobra 155,000 ka mga residente sa syudad sang Iloilo ang naka-pre register para sa nagapadayon nga COVID-19 vaccination.
Ini ang masobra 30% sang 400,000 ka mga tawo nga amo ang target sang Iloilo City Government nga mabakunahan agud nga malab-ot na ang herd immunity.
Santo naman sa latest data sang Iloilo City Government, as of May 19, may yara na sang 22,342 nga kabug-usan nga nabakunahan sa syudad.
Sa interview sang Bombo Radyo kay Francis Cruz, chief sang Information Technology Services Division, iya ginpahayag nga bukas sa gihapon kag ginhimo nga mas matawhay ang registration sa vaccination centers.
Ang mga luyag magpa-register ang pwede gid magpadulong sa malls (Festive Mall Ground Floor hallway, Robinsons Main Ground Level Ledesma Wing, kag SM City Lower Ground Floor) kag sa 180 ka mga barangay halls.
Sa mga residente sang syudad, kinahanglan ipresentar ang valid ID with address kag sa mga non-residents naman, kinahanglan ang company ID nga may business address.
Wala sang online registration suno kay Cruz bangud mabudlay ang validation kun mag-abot na sa vaccination site.
Kun naka-pre register na ang isa ka tawo, mangin tayuyon na ang proseso kun mag-abot sa vaccination center kag malikawan ang pagginutok.
Istrikto nga ginapatuman sa nagapadayon nga vaccination rollout amo ang: pagsunod sa schedule, wala sang walk-ins, kag kinahanglan bitbiton ang ticket.
Una na nga ginpahayag ni Mayor Jerry Trenas nga nagahingyo siya sa national government sang dugang nga suplay sang bakuna agud mas mapasangkad pa gid ang COVID-19 vaccination program sang syudad.
