ILOILO CITY – Nagsaka na sa pulo ang nagkalamatay bangud sang epekto sang magnitude 7 nga linog sa Northern Luzon.
Suno kay Mark Timbal, spokesperson sang National Disaster Risk Reduction and Management Council (NDRRMC), ang lawas sang apat ka mga una nga gin-report nga missing sa Abra ang nakita na.
Nagahulat na gid lamang sila sang official nga report may kaangtanan sa identities sang apat ka mga nagkalamatay.
Nagdangat sa 19,486 families sa 246 barangays sa Ilocos kag CAR ang apektado sang linog suno sa ahensya.
1,583 ka mga panimalay ang nagkalaguba kun sa diin, 1,535 ang partially kag 48 totally damaged sa Ilocos kag CAR.
Nagdangat naman sa P48.3 million ang balor sang damage nga na-report sa Ilocos, Cagayan, kag CAR.
Masobra naman sa 1, 000 ka aftershocks ang na-record pagkatapos sang magnitude 7 nga linog sa Abra suno sa Philippine Institute of Volcanology and Seismology (PHIVOLCS).
