ILOILO – Nagapabilin nga kalmado ang residente sa Middle East sa pihak sang nagapadayon nga pagsaka sang tensyon sa Iran kag Estados Unidos.
Sa interview sang Bombo Radyo kay Rose Marie Dela Cruz, isa ka Overseas Filipino Worker sa Lebanon kag tumandok sang Miag ao,Iloilo iya ginpahayag nga apisar ginpaidalom na sila sa Level 4 daw kaangay nga wala lang sang natabo bangud padayon sa gihapon ang ila nga trabaho kag wala man sang nagaluntad nga ginamo.
Suno kay Dela Cruz, maluwas sa hotline nga ginhatag sa ila sang Philippine Embassy nga mahimo nila malab ot sa tion nga may matabo sa ila wala na sang iban nga abiso ang embahada kun ano ang ila himuon.
Dugang sang natungdan, isa lang ang ginakabalak an nila subong amo ang krisis nga ginapangatubang nila sa Lebanon sa diin nangin mabudlay ang pagsulod sang kwarta kag nagmalahal ng presyo sang balaklon bangud man sa nagapadayon nga tensyon.
Sa pihak sang kalmado nga sitwasyon sa Lebanon, nagahingyo sa gihapon si Dela Cruz sang pangamuyo sa bug os nga Pilipinas nga mangin hilway lang sila sa ginamo bangud sa tion nga madayon ang gyera sa tunga sang Estados Unidos kag Iran sila gid mismo sa Lebanon ang una nga ma igo bangud yara ini sa tunga gid sang nasambit nga mga pungsod.
Nagpasalig man ang natungdan sa iya mga himata sa Pilipinas ilabi na sa Miag ao nga wala sang dapat nga kabalak an bangud matawhay ang iya nga sitwasyon kag yara siya sa maayo nga kahimtangan.
Samtang, kaangay man nga sitwasyon ang ginakesperyensya sang mga Oversear Filipino Worker sa Jeda, Saudi Arabia.
Sa interview sang Bombo Radyo kay Nhene Rayz Tapang OFW sa nasambit nga lugar kag tumandok sang Ajuy, Iloilo iya ginpahayag nga sa pihak sang matawhay nga sitwasyon sa Jeda padayon ang ila pagpangamuyo bangud indi imposible nga magluntad ang gyera sa tunga sang Iran kag Estados Unidos.
Suno kay Tapang, handa sila nga magpauli sa tion nga mag abiso ang embahada bangud pat-ud nila nga para ini sa ila ikaayo.
Nagpasalig naman ang natungdan sa iya mga himata sa Ajuy nga wala sila sang dapat nga kabalak an bangud yara siya sa maayo nga kahimtangan.
