Gin-abisuhan sang embahada sang Pilipinas sa Egypt ang mga Pinoy sa Sudan nga magpabilin anay sa sulod sang balay sa tunga sang nagakatabo nga kinagamo kag away sa Khartoum nga amo ang kapital sa amo nga pungsod.
Ginpanugyan sang embahada nga magpakig-angot ang mga Pinoy sa consulate sa Khartoum ukon sa Philippine Embassy sa Cairo agud mahibaluan ang ila nga sitwasyon.
Sa ikaduha nga adlaw sang daku nga away sa Khartoum sa tunga sang rival generals nga amo ang nakaangkon sang gahum sang 2021 coup, nagdangat na sa 56 ka mga sibilyan ang patay kag ginatos ang napilasan.
Sabado sang aga sang nagsugod ang amo nga patyanay kasunod sang sinemana na nga tensyon sa tunga ni army chief Abdel Fattah al-Burhan kag sang deputy nga si Mohamed Hamdan Daglo, commander sang daku kag armado nga grupo nga paramilitary Rapid Support Forces.
Padayon naman ang apelar sang medics para sa hilway nga lugar nga maagyan sang mga ambulansya. Ginahingyo man ang ceasefire agud mabulong ang mga biktima.
Sa bahin ni United Nations chief Antonio Guterres, nagpanawagan ini nga gilayon nga untatan na ang amo nga kalakasan. Si US Secretary of State Antony Blinken naman ang nagpahayag nga ini nga way ang daku nga pamahog sa seguridad kag sa safety sang mga Sudanese civilians.
