ILOILOCITY– Ginpang amat-amat na kakas ang mga poste sang kuryente nga nagabalabag sa mga dalanon sa syudad sang Iloilo.
Ini ang may kaangtanan sa mandu ni Presidente Rodrigo Duterte nga pagpanghawan sang mga obstructions sa mga national road.
Sa interview sang Bombo Radyo kay Engr. Rodney Gustilo, pinuno sang Iloilo City District Engineer’s Office sang Department of Public Works and Highways, iya ginpahayag nga gin-umpisahan na ang pagkakas sang mga poste sa mga dalanon sa syudad apang may yara sa gihapon nga nabilin.
Suno sa natungdan, ang Panay Electric Company ang may katungdanan nga kuhaon ang tanan nga mga poste sang kuryente nga makabig obstruction sa dalan.
Sa subong wala siya sang ideya kun san-o maga-umpisa sa liwat ang pagpangkakas sang mga poste.
Sa pagkamatuod, madugay na ini nga ginmandu sa Panay Electric Company kag nagpasalig man ang kompaniya nga tapuson ang pagpanghawan sa katapusan sang tuig 2018 apang tubtub subong wala sa gihapon matapos.
