Ginpahalugan sang Archdiocese of Jaro ang pila ka mga protocols may kaangtanan sa obserbasyon sang Semana Santa subong nga tuig.
Ini ang kasunod man sang mas relaxed nga quarantine restrictions nga ginapatuman sang national kag local government.
Indi kaangay sang Holy Week 2020 nga ginsuspinde gid ang tanan nga pisikal nga aktibidad kag nabatian lang kag nalantaw ang mga misa paagi sa radyo kag livestreaming, may mga aktibidad na subong ang simbahan nga sarang matambungan sang mga tumuluo.
Ang Circular Letter nga gin-isyu ni Jaro Archbishop Most Reverend Jose Romeo O. Lazo, D.D. sa guidelines sang liturgical and devotional celebrations ang nagalakip man sang instructions halin sa Congregation for Divine Worship and Discipline of the Sacraments kag sa Catholic Bishops Conference of the Philippines.
Yari ang pila ka salient points sa amo nga guidelines:
Wala na sang prusisyon nga patigayunon nga nagalibot sa banwa kag may kabataan nga anghel nga nagakanta sang Regina Coeli; sa baylo, ang pari na lang kag ang kaupod nga ministro nga nagasakay sa salakyan ang magadala sang krus samtang ang mga tawo ang magabantay lang sa atubang sang ila nga balay kag magabutang sang altar.
Wala man sang visita iglesia kag wala man sang paghalok sa Santo Entierro.
Ang pag-bendisyon naman sa ramos ang pwede man mahimo sa iban nga scheduled masses sa parokya agud indi magginutok ang mga tawo.
Amo man sa gihapon ang traditional schedule sang Chrism Mass ukon Krisma nga natuon sa Hwebes Santo, apang subong nga tuig, limitado ang attendance sang mga pari, mga tumalambong, kag liturgical ministers.
Sa Byernes Santo, ang Siete Palabras ang pwede na matambungan sang mga tawo apang limitado lang ang makasulod sa simbahan agud masunod ang physical distancing measure. Para sa mga indi makapadulong sa simbahan, mahimo man gihapon ini malantaw online kag mapamatian paagi sa Bombo Radyo.
Wala naman sang prusisyon sa mga pasos.
Ang Easter Vigil ukon Misa Vigilia ang pwede maselebrar umpisa las siete sa gab-i, depende sa curfew nga ginapatuman sang kada LGU.
Sa interview sang Bombo Radyo kay Rev. Fr. Angelo Colada, director sang Social Communications sang Archdiocese of Jaro, iya ginpahayag nga ipaiway man anay subong nga tuig ang taltal agud indi magdugok ang tuman kadamo nga mga tawo.
Gina-engganyo gid ang mga parokya nga ipahibalo sang maayo sa mga tumuluo ang pagasundon nga seating capacity agud indi sila magginutok sa simbahan.
Santo sa liturgical calendar, ang Holy Week ang magaumpisa sa Marso 28 kag magalawig tubtob Abril 4.
