Mismo si President Ferdinand ‘Bongbong’ Marcos, Jr. ang nagpahayag nga wala sang bisan isa nga pulitiko sa Tarlac ang nakakilala kay Bamban Mayor Alice Guo.
Ginkumpirma man sang presidente nga madugay na nga gina-imbestigaran ang amo nga alkalde bangud sa ginapahayag nga makaduluda nga rekord.
“Kilala ko lahat ng mga taga-Tarlac na politico, walang may kakilala sa kanya. Kaya nagtataka kami, kung saan nanggaling ito?” pahayag ni Marcos.
”Well, matagal na naming inimbestigahan ‘yan, kaya naman nahuli ‘yan eh… Dahil ni-raid natin ‘yung sa Bamban at nakita natin [unclear] nga ‘yung mga dokumento, na kinukwestyon ngayon natin ‘yan, kung talagang totoo ‘tong mga to, at saka paano siya tumakbo ng mayor?” dugang sini.
Wala gin-athag ni President Marcos kun ang raid nga iya ginatumod amo man ang raid nga gin-conduct sa Philippine offshore gaming operation (POGO) compound sa Bamban.
Suportado man sang presidente ang imbestigasyon sa citizenship sang alkalde.
”Kaya kailangan talagang imbestigahan. So, kasabay ng sa Bureau of Immigration, pati—siguro may magku-kwestyon ng taga citizenship. ‘Yun lahat i-imbestigahan natin ‘yan kasama ang imbestigasyon, hearing na ginagawa ng Senado,” pahayag sini.
Si Guo amo ang mayor nga agaw-atensyon sa hearing sang Senado bangud wala ini sang madumduman sa mga personal nga detalye sa iya nga kabuhi kag ginakwestyon na subong pati ang nationality sini matapos ginakuno-kuno nga isa ka Chinese citizen.
Sang nagligad nga semana sang ginpatawag ini sa Senado kun sa diin ginapatigayon ang hearing kaangot sa POGO compound sa Bamban sa Tarlac. Nagaguwa ang iya pangalan nga may kaangtanan sa amo nga firm nga gin-raid sang otoridad sang Marso bangud sa ginaalegar nga human trafficking kag serious illegal detention.
Sa hearing, ginkwestyon ni Senator Risa Hontiveros ang identity sang alkalde bangud wala ini sang opisyal nga record nga mapakita nga isa siya ka Filipino. Ginsiling man ni Hontiveros nga nagbutig si Guo sang ginpanginwala sini ang koneksyon sini sa Hongsheng Gaming Technology, Inc.
Kun basehan ang pahayag sang senadora, naglutaw lamang ang pangalan ni Guo sang 2022 elections apang wala man ini sang hospital record kun sa diin ini nabun-ag kag wala man sang school records sa Pilipinas bangud gina-insister sini nga na-homeschool lamang siya kag indi na sini matandaan ang homeschool provider.
Nabuyagyag man nga ang registration of live birth ni Guo ang natabo sang nagaedad na ini sang 17-anyos.
Sa Kamara naman, ginpahayag ni House Assistant Majority Leader kag AKO Bicol party-list Rep. Raul Angelo ‘Jil’ Bongalon nga mahimo man maka-conduct ang lower chamber sang parallel investigation sa amo nga alkalde. Ginlaragway man sini nga seryoso kag maka-alarma nga isyu kun gina-alegar nga isa ka Chinese citizen ang nasambit nga alcalde.
Una naman nga nagpahayag ang Comelec nga possible makasuhan sang perjury si Mayor Guo kun mapamatud-an nga nagabutig ini sang nagdeklarar ini nga siya siya ka Filipino citizen sang iya gin-file ang iya nga Certificate of Candidacy (COC). #
