CARLES,ILOILO – Naga-eksperyensiya na sang gutom ang mga residente sang isla sang Gigantes, Carles, Iloilo bangud nga naubusan na sang bugas sa isla.
Ini kasunod sang pagdumili sang Philippine Coastguard sa mga motorbanca nga makalayag gikan sa isla padulong sa mainland bangud sa malain nga panahon.
Sa interview sang Bombo Radyo Iloilo kay Punong Barangay Mateo Solon sang Barangay Gabi, Gigantes Sur, iya ginpahayag nga kapin isa ka semana na nga wala nakabyahe ang mga motorbanca kag wala naman nakakarga sang bugas gikan sa mainland ang mga rice retailers sa isla.
Suno kay Solon, indi problema ang pangbakal sang bugas sang mga residente bangud ang problema amo nga wala na sang nabilin nga bugas ang mga tindahan sa isla.
Suno pa sa iya, wala naman nakapangisda ang mga residente nga nagapanguna nga ginakuhaan nila sang pagkaon.
Magluwas sa mga residente, apektado man ang masobra sa 100 ka mga turista sa isla nga na-stranded matapos wala na gintugutan nga maglayag ang mga pumpboats pakadto sa mainland.
Nahibaluan nga may yara sang masobra sa 16,000 ang populasyon sa nasambit nga isla.
