Natukiban sa autopsy nga kulang na ang mga organs sang mga biktima nga bangkay na sang nasapwan sa sulod sang kagulangan sa Kenya.
Ini nga mga biktima ang sumulunod sang Good News International Church cult, kag ginpahayag ginsugo sang ila lider nga si Paul Mackenzie nga magpagutom tubtub mapatay agud makakit-anay sila sang Ginuo.
Antes naaresto si Mackenzie, ginpahayag nga nagpromisa pa ini sa iya nga mga sumulunod nga makasaka sila sa langit antes matapos ang kalibutan sa Abril 15.
Sini lang nga semana sang ginkumpirma sang interior ministry nga natapos na ang post-mortem examinations sa 112 ka mga bangkay nga nakutkutan sang mga otoridad.
Bangud sa kulang nga mga organs, isa sa ginapatihan suno sa pulis amo ang pagbaligya sini kag may yara pa sang involved nga mga suspek magluwas kay Mackenzie.
Matandaan nga sang nagligad nga bulan sang natukiban ang mass graves sa sulod sang kagulangan sa coastal town sang Malindi sa amo nga pungsod.
Apisar nga pagpagutom ang nagapanguna nga rason sang kamatayon sang mga biktima, naguwa man sa eksaminasyon suno kay chief government pathologist Johansen Oduor nga iban sa ila lakip na ang kabataan ang ginpangkuga, ginpangkastigo, kag ginpuot agud nga mapatay. #
