Puno sang lagob kag kaangay nga bag-o lang nakaagi-sapote ang apat ka mga suspek nga ginatudlo nangamot sa pag-atake sa concert sa Crocus City Hall sa Russia nga nagbilin sang 139 na ka mga patay.
Base ini sa mga laragway kag videos nga ginpaguwa sang korte kun sa diin tatlo sa kalalakinhan ang nagapamalanog ang nawong kag isa ang may tabon sa dulunggan. Ang ikaapat naman ang haluson na makahulag kag makamuklat samtang nagapungko sa prisoner’s box, nagasuksok sang hospital gown, kag nakasakay pa sa stretcher.
Ginpangalanan sila sang Basmanny District Court of Moscow nga sanday Dalerdzhon Mirzoyev, Saidakrami Rachabalizoda, Shamsidin Fariduni kag Mukhammadsobir Faizov — nga suno sa Tass state news agency, pareho nga mga citizens sang ex-Soviet state nga Tajikistan.
Antes ginpasulod sa courtroom, naglapta na ang mga laragway sang mga suspek kun sa diin bayolente ang pagtratar sa ila sa custodial facility.
Palareho sila nga ginpasakaan sang kaso nga terror act nga posible madagdagan sang penalidad nga bilog nga kabuhi nga pagkapreso. Sa inisyal nga impormasyon, tatlo sa apat ka defendants ang nag-plead nga guilty sa akusasyon.
Una na nga gin-claim sang Islamic State group ukon ISIS nga sila ang may kahimuan sa amo nga terror attack nga gindungan sa concert sang popular nga banda nga “Picnic”. Sang nagligad nga Domingo, nag-obserbar ang Russia sang national day of mourning agud nga magpakita sang kasubo kag simpatiya sa pamilya sang masobra 100 ka mga biktima.#
AP; AFP via Getty Images
