Dako ang posibilidad nga may balatian sa kidney ang isa ka-tawo nga may yara sang bad breath.
Sa interview sang Bombo Radyo kay Dr. Glynis Tingson, Nephrologist, iya ginpahayag nga ang kidney sang tawo amo ang isa ka pares sang fist-sized, bean-shaped organs nga nahamtang sa back muscles sang upper abdomen.
Responsable ang mga kidney sang tawo sa paglimpyo sang 110-140 ka litro sang dugo kada adlaw.
Nagabalanse man ang kidney sang fluid sa lawas sang tawo samtang ginabalanse man ang suplay sang electrolytes kaangay sang potassium kag sodium.
Suno kay Tingson, isa sa mga sintomas sang balatian sa kidney amo ang bad breath sa tion nga indi na normal ang paghaboy sang amo organ sang urea.
Pahayag sang doktor, sa tion nga mag-occur ang uremia sa kidney sang tawo, nagaresulta ini sang bad breath ukon baho nga ginatawag nga ammonia.
Nagatuga ini sang metallic taste sa mga bibig kalakip na ang pagkadula sang gana sa pagkaon kag pagnubo sang kabug-aton.
Agud malikawan ini suno sa doktor, yari ang pila ka mga tips;
- mag-inom sang bastante nga tubig;
- mangin aktibo sa cardiovascular fitness;
- likawan ang over the counter medications ukon malawig nga paggamit sang anti-inflammatory medications; kag
- magkaon sang masustansya nga pagkaon
Sa pihak sini, gin-athag man sang doktor nga ‘safe’ naman ang COVID-19 vaccine para sa mga pasyente nga may balatian nga advanced kidney disease.
