Wala sang na-monitor nga barko sang China sa West Philippine Sea kadungan sang joint exercise sang Pilipinas, France, kag Estados Unidos sang Amerika nga kabahin sang tuigan nga war games sa pungsod.
Huwebes sang aga sang nagbiya ang BRP Ramon Alcaraz kag BRP Davao del Sur sa Puerto Princesa, nga ginsundan sang French frigate nga Vendémiaire kag landing ship dock nga United States Ship (USS) Harpers Ferry.
Sa Byernes, nagpadayon ang fleet sa pagpatigayon sang “division tactics” nga nagatutok sa refining strategies kag maneuvers agud mapasanyog pa ang epektibo nga force deployment kag koordinasyon.
Lakip sa mga aktibidad amo ang medical evacuation drills nga ginsundan sang cross-deck landing paagi sa French Navy FH160 helicopter.
Suno kay Balikatan information bureau chief Lt. Col. John Paul Salgado, ini nga trilateral fleet ang maga-perform man sang maritime search and rescue, kag magatipon man para sa communication kag photo exercises sa masunod nga inadlaw.
Ang naval activities sa western section sang exclusive economic zone ang magalawig tubtub sa Abril 29.
Una na nga ginpahayag ni Commodore Roy Vincent Trinidad, Navy spokesperson for the West Philippine Sea, nga ginalauman na nga maga-behave ang China kun may presensya sang barko sang iban nga nasyon bangud nga nagagamit ang mga ini sang military ship.
“Historically the illegal, unprovoked, uncalled for actions of China will only be to [the] Philippines,” pahayag sini.#
