Nadakpan ang isa ka babaye nga nagtuyo nga magpalusot sang iligal nga droga sa iya bana nga nagapanimuron sa sulod sang Caloocan City Jail.
Ini nga babaye, 45, ang nagbisita sa amo nga jail facility sang nagligad nga Byernes, Abril 5.
Sa routine search pa lamang, nakit-an na sang otoridad ang anum ka sachets sang ginapatihan shabu nga gintago pa sini sa pribado nga parte sang iya nga lawas.
Suno kay Jail Superintedent Jerome Verbo, ginbutang ang droga sa plastic, gin-selyuhan sang condom, kag gin-insert sa iya nga kinatawo.
“Very elastic yan, papasok talaga,” suno kay Verbo.
Magluwas sa drugs, nakumpiska man sa babaye ang aluminum foil kag 60 ka sigarilyo.
Nagpaandam man ang natungdan nga indi makalusot ang ini nga mga taktika sang mga bisita bangud maid-id ang search sa pasilididad kun sa diin kun babaye ang magasulod, lady personnel man ang assigned nga mag-rikisa.
Bangud sa hitabo, indi lamang bana ang nahal-id sa presuhan kundi pati ang misis nga kasuhan man sang illegal possession of drugs. #
