ILOILO CITY- Nagpabutyag sang pagkadismaya ang Iloilo City Council sa More Electric and Power Corporation bangud sa sunod-sunod nga mga scheduled kag unscheduled power interruptions sa Syudad sang Iloilo.
Sa privilege speech ni Iloilo City Councilor Rommel Duron, chairman sang Committee on Energy and Public Utility sa konseho, iya ginpahayag nga mahangpan niya ang mga malip-ot kag scheduled nga mga brown-outs apang indi ang malawig kag wala na schedule nga mga brown-outs.
Gintumod pa niya ang natabo nga brown-out sang Hunyo 20 tubtob 21 nga naglawig sang 13 ka oras sa diin naapektuhan ang distrito sang Mandurriao.
Suno kay Duron, nagpangayo naman sang pasaylo ang More Power pinaagi sa ila tagpamaba nga si Mr. Jonathan Cabrera nga personal nga ginpadulungan ni Duron agud istoryahon tuhoy sa mga nagaluntad nga brown-outs.
Ginakabig naman ni Iloilo City Councilor Ed Peñaredondo nga pagpanunto ang ginahimo sang More Power sa Syudad sang Iloilo.
Sa mensahe ni Peñaredondo, iya ginpahayag nga wala napanindugan sang More Power ang ila promisa nga indi na masulit ang naeksperyensiyahan sang syudad sang ang Panay Electric Company pa ang power distributor.
Suno naman kay Councilor Ely Estante, kuntani nagbakal kag nagtukod na lang sang bag-o nga mga pasilidad ang More Power sa baylo nga gin-expropriate ang mga pasilidad sang Panay Electric Company.
Pinaagi sini, wala na kuntani nabudlayan ang More Power sa pagkaayo sa mga gubaon nga pasilidad sang Panay Electric Company nga amo ang ginatunaan sang brown-out.
May kaangtanan diri, ipatawag naman sang Iloilo City Council ang More Power matapos ginrekomenda ni Estante kay Duron ang pagpatigayon sang investigation in aid of legislation agud pasabton ang power distributor nga gintalana sa Hunyo 30.
