Nagluntad nga vehicular accident kun sa diin involved ang isa ka motorsiklo kag isa ka EcoSport nga SUV sa Barangay Lanit, Jaro, Iloilo, pasado alas-8 subong nga gab-i, Agosto 3.
Sa interview sang Bombo Radyo kay Alyas Krissha, residente sang nasambit nga lugar, iya ginpahayag nga wala nila naaktuhan ang natabo nga pagbunggoanay apang nakabati sila sang mabaskug nga tunog nga daw lupok nga nag-gikan sa goma sang salakyan.
Gilayon nila gin kadtoan ang area kung sa diin natabo ang insidente kag ila nakita ang driver sang motorsiklo nga nagahuray-ad na sa dalan kag nagapaligo sang iya kaugalingon nga dugo.
Ginpahayag man sini nga ang driver sang motorsiklo ang nakaangkon sang patal nga pilas.
Apang ang driver naman sang SUV, nakita nga nagakamang pasaka sa karsada matapos mahulog ang iya ginamaneho nga salakyan sa talamnan.
Suno pa sa natungdan, ang SUV padulong kung tani sa banwa sang Leganes samtang ang motorsiklo pakadto sa Buhang, Jaro, Iloilo City.
Dugang pa ni Alyas Krissha, gin-ako mismo sang driver sang SUV sa mga otoridad nga siya ang yara sa impluwensya sang makahulubog nga ilimnon sang matabo ang insidente.
Padayon pa ang imbestigasyon sang mga kapulisan agud masaysay gid ang kabug-osan nga natabo.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
