ILOILO CITY – Naghimo sang maragtas ang isa ka myembro sang Panay Bukidnon Tribe matapos nangin pinakauna nga katapo sang Indigenous Peoples nga nag-graduate bilang Valedictorian sa PHINMA University of Iloilo.
Ini amo si Roniel Chiva, tumandok sang Barangay Garangan, Calinog, Iloilo kag nagtapos sa kurso nga Bachelor of Science in Civil Engineering.
Si Chiva ang agot sa pito ka mag-utod sa diin ang iloy sini ang isa ka kabulig kag mangunguma samtang ang amay naman sini ang isa ka panday kag manughimo sang binangon.
Sa interview sang Bombo Radyo kay Chiva, iya ginpahayag nga tuman ang iya kalipay matapos nabayluhan sini sang pasidungog ang kabudlay sang iya mga ginikanan.
Suno kay Chiva, mabudlay ang kurso nga Civil Engineering, apang bangud sa handom sini nga makabulig sa iya pamilya kag tribu, nanginguha ini sa diin nangin bonus pa ang iya latin honor nga Magna cum laude.
Dako man ang nabulig sa iya pag-eskwela nga nangin scholar ini matapos napabilin ang mataas nga grado kag aktibo man bilang student leader kag sa community service.
Tuman naman ang pagpasalamat sini bangud sa pihak sang kapigaduhon, nagapadala gid sang allowance ang iya ginikanan sa diin ginsupot niya ini agud ibakal sang libro.
Sa subong, plano naman sini nga magkuha sang Civil Engineers Licensure Examination.
