ILOILO – Nakapadulong na sa ila tagsa ka mga lugar ang mga na-stranded nga pasahero sa mga pantalan bangud sa Bagyo Tisoy.
Ini matapos nga ginkakas na ang Tropical Cyclone Wind Signal No. 1 sa Iloilo.
Sa interview sang Bombo Radyo kay PO1st Romulo Sancio, sub-station commander sang Philippine Coast Guard (PCG) Dumangas, iya ginpahayag nga matapos ginbatak ang Tropical Cyclone Wind Signal No. 1 sa Iloilo, ginpasugtan naman nga maglayag ang mga roll-on roll-off (RoRo) vessel.
Suno kay Sancio, sa subong balik na sa normal ang byahe sang mga barko sa mga pantalan partikular sa RoRo port sa Sitio Naluuyan, Brgy. Sapao, Dumangas, Iloilo sa diin nagdangat sa masobra 200 ang na-stranded.
Samtang, sa iban naman nga pantalan nga may nagabyahe nga barko kaangay sang Iloilo Fastcraft Terminal sa Progreso, Lapuz Iloilo City, nakahalin naman ang masobra 50 ka mga na-stranded nga pasahero.
Sa Philippine Ports Authority (PPA) Terminal naman sa Fort San Pedro Iloilo City, padayon man ang pagbyahe sang mga barko padulong sa Iloilo Guimaras vice-versa.
Sa Iloilo Ferry Terminal Parola naman, balik na sa normal ang byahe sang mga pump boat via Iloilo-Guimaras vice versa.
