ILOILO CITY- Nagpabutyag sang iya tuman nga pagkatublag si United Nations rights chief Volker Turk sa pagkawas-ag sang Nasser kag Al Shifa medical facilities sa Gaza kag pagkadiskubre sang mass graves nga nagaunod sang ginatos ka mga lawas.
Una nga ginreport sang Palestinian authorities ang tuhoy sa mass graves sa Nasser hospital sa Khan Younis matapos ini gin-abandonar sang Israeli troops.
Suno kay Ravina Shamdasani, spokesperson sang United Nations High Commissioner for Human Rights, makasilidni ang sitwasyon sang mga bangkay bangud nga ang iban sa ila ang nakagapos ang mga kamot nga nagapakita sang maathag kag seryoso nga paglapas sa international human rights law kag international humanitarian law, kag dapat ini nga paimbestigaran.
Dugang niya, nagapakig- angot na ang UN human rights office sa Palestinian officials nago sa 283 ka mga lawas nga nakit- an sa Nasser kag 30 sa Al Shifa.
Suno sa reports, ang pila sa mga lawas ang natampukan sang mga basura kag nagalakip ini sang mga babayi kag mga tigulang.
