Ginkumpirma sang Philadelphia 76ers nga indi anay pagpahampangon sa preseason ang ila sentro kag former NBA Most Valuable Player (MVP) nga si Joel Embiid samtang ginapaayo-ayo pa sini ang iya nga tiil.
Kabahin man ini sang iya preparasyon para sa mas maayo nga kondisyon sa pagbukas sang regular season.
Gin-anunsyo sang 76ers ini nga desisyon matapos wala nag-upod si Embiid sa preseason games batok sa Minnesota Timberwolves sang Sabado kag batok sa Boston Celtics sang Domingo.
Suno sa team, padayunon gihapon sang 30-anyos nga basketball star ang individual treatment plan. Magluwas pa ini sa nadula sa iya nga 25 tubtub 30 pounds sa offseason agud nga mabuhinan ang pressure sa iya nga tiil.
Buot silingon sini, wala man siya sa hampang batok sa Atlanta Hawks subong nga aga, batok sa Brooklyn Nets sa Huwebes, kag batok sa Orlando Magic sa Sabado.
Magabukas ang regular season sang Philadelphia sa Oktubre 23 batok sa pangayaw nga Milwaukee Bucks.
Matandaan nga si Embiid ang nakahampang lamang sa 39 games sang nagligad nga regular season bangud sa injury sa wala nga tuhod kun sa diin nagpaidalom pa ini sang operasyon sang Pebrero.
Kaupod man siya sa Team USA nga nakabulsa sang gold medal sa Paris Olympics apang nangin mahinay ang performance bangud sa injury issue.
Subong nga season, ginakabig ang 76ers nga daku nga balabag sa reigning champions nga Boston Celtics sa Eastern Conference apang ginalantaw man sang analysts nga mahimo lamang nila ini kun mapabilin nga healthy sanday Embiid kag Paul George nga lunsay may history sang injury.#
