ILOILO – Gin-athag ni Iloilo Fourth District Board Member Domingo Oso Jr,. chairman sang Committee on Appropriations sa Sangguniang Panlalawigan, nga indi ‘luxury’ kundi necessity ukon para sa kinahanglanon ang ginduso nga pagbakal sang mga salakyan para sa mga board members sang probinsya.
Sa interview sang Bombo Radyo kay Oso, iya ginpahayag nga wala lang nagapungko kag nagahimo sang mga resolution kag nagatambong sang session ang mga board members bangud may iban pa sila nga katungdanan nga kinahanglan ang pagbyahe.
Lakip sa sini nga mga katungdanan amo ang pagtambong sa pagsinapol sa iban nga mga banwa kag pagtiglawas sa provincial government kun wala ang gobernador kag bise-gobernador.
Ginpahayag pa ni Oso nga 2019 pa lang, nagsugot na ‘by principle’ si anay Iloilo Governor Arthur Defensor Sr. nga magbakal sang salakyan apang wala lang natigayon bangud wala sang pondo.
Bilang pinuno man sang Committee on Rules, Privileges, and Public Accountability, ginsulit ni Oso ini nga hingyo subong nga tuig apang kinahanglan ng mag-share lang ang duha ka board members sa tagsa ka distrito.
Ginpahayag man ni Oso nga batunon man nila kun ano man nga sahi sang salakyan ang ihatag sa ila nga opisina. Una na nga ginpahayag ni Vice Governor Christine Garin nga posible sa Hunyo pa maabot ang amo nga mga salakyan. #
