Ginhingadlan ang Filipino journalist kag Nobel Peace Prize laureate nga si Maria Ressa bilang principal speaker sa 373rd commencement ceremony sang Harvard University!
Si Ressa ang magaatubang sa Class of 2024 kadungan sang morning exercises sang seremonya sa Tercentenary Theater sa Cambridge, Massachusetts sa Mayo 23 kag magabaton man sang honorary degree halin sa nasambit nga unibersidad bilang parte sang ceremony proceedings.
Sa Harvard Gazette nga amo ang university-run publication, ginsiling ni Harvard interim president Alan Garber nga gina-representar ni Ressa ang “veritas” ukon truth: “For nearly 40 years, she has dedicated herself to truth – its pursuit, its advocacy, and its defense – no matter the repercussions.”
Matandaan nga sang 2021, nadag-an ni Ressa ang Nobel Peace Prize kaupod sa Russian journalist/Novaya Gazeta editor-in-chief Dmitry Muratov bangud sa iya pagpakigbato sa “freedom of expression” nga ginatawag nga “precondition for democracy and lasting peace.”
Nagdaku siya sa New Jersey matapos nga mag-migrate ang iya pamilya sa US sang naga-edad siya sang 10 ka tuig. Nagtuon siya sa Princeton University, nagtapos bilang cum laude sang 1986, kag nagbalik sa Pilipinas agud nga ipadayon ang karera sa journalism.
Nagpangatubang ini sang pila ka kaso lakip na ang libel conviction kag tax fraud nga iya ginkabig nga daku nga pagpanghangkat sa press freedom sa Pilipinas.
Lakip man sa iya sampaw-sampaw nga kadungganan amo ang 2020 Journalist of the Year award, ang 2020 John Aubuchon Press Freedom Award, kag ang 2018 Knight International Journalism Award.
Sa pihak nga bahin, nalakip naman sa recent speakers sa commencement ceremonies sang Harvard amo ang aktor nga si Tom Hanks, former New Zealand Prime Minister Jacinda Ardern, kag US Attorney General Merrick B. Garland.#
