Nagpatigayon ang North Korea sang panibag-o nga test sa bag-o nga sahi sang underwater drone nga ginpahayag makasarang sa pagpatigayon sang nuclear attack.
Suno sa report nga ginpaguwa sang Korean Central News Agency, ang drone nga ginatawag “Haeil-2 Unmanned Underwater Nuclear Attack Boat’” ang ginpaidalom sa test halin sang Abril 4-7.
Ini ang ikaduha na nga tion nga ginpahayag sang Pyongyang nga nag-test ini sang nuclear capable drone sa idalom sang dagat.
Sang Marso sini una gin-claim nga gin-test ang Haeil-1 nga makasarang suno sa pungsod sa pagdala sang nuclear missile kag makatuga sang “radioactive tsunami.”
Ginpahayag pa sang North Korean state media nga si President Kim Jong Un mismo ang personal nga nagpanguna sa pag-test sang simulated underwater nuclear strategic weapon sang nagligad nga Marso.
Halin 2012 pa sang gina-claim sang North Korea nga nagahimo ini sang nuclear capable drones kag masobra naman 50 ka tests ang nahimo sa nagligad nga duha ka tuig.
Duda naman ang mga analysts sa pahayag sang Pyongyang kag nasabat nga ginapasobrahan lang sang North Korea ang istorya sa ila kapasidad kag deployment time lines.
