Ginapanan-aw sang Estados Unidos sang Amerika nga magapatigayon liwat si North Korean leader Kim Jong Un sang testing sang nuclear device agud makatukod sang nuclear arsenal nga amo ang iya ginakabig nga “ultimate guarantor” sang iya nga pagginahum.
Suno pa sa 2023 Annual Threat Assessment report sang Amerika, posible nga padayunon ni Kim ang pagpalupad sang nuclear-capable missiles agud mahimo na lang nga normal ang missile testing sang Pyongyang.
Nahibaluan nga anum na ka nuclear tests ang nahimo sang North Korea halin sang 2006 kag labi man nga nagabaskog samtang nagadugay.
2017 sang katapusan sini ginpatigayon ang nuclear test.
Gin-report man sang Estados Unidos nga ginapondohan sang North Korea ang ila nga nuclear programs paagi sa kuwarta nga nakuha sa kriminal nga mga aktibidad lakip na ang cryptocurrency theft.
“In one heist in 2022, Pyongyang stole a record $625 million from a Singapore-based blockchain technology firm,” pahayag sang report sa US.
Matandaan nga sang nagligad nga anum ka bulan, gintuon gid sang North Korea ang ila nga pagpalupad sang missiles sa schedule man sang military exercises sang Estados Unidos sang Amerika kag sang South Korea. ##
