ILOILO CITY – Istrikto nga ginapatuman ang coronavirus restrictions kadungan sang pagbukas sang mga lodging houses sa syudad sang Iloilo matapos ginpaidalom na sa Modified General Community Quarantine (MGCQ) umpisa subong nga adlaw, Hunyo 1.
Sa interview sang Bombo Radyo kay Gigi, tag-iya sang isa ka lodging house sa Brgy. Sto. Niño Norte sa distrito sang Arevalo, iya ginpahayag nga ang ginapahanugutan lamang nga mga customer nga makasulod amo ang nagasunod sa health protocol.
Ini amo ang mga nagasuksok sang face mask kag naga-disinfect sang kamot gamit ang alcohol kag hand sanitizer.
Bangud wala pa sang temperature scanner nga mahimo magamit sa pag-check sang temperatura sang mga customer, ginpahayag ni Gigi nga ‘manual’ lang anay ang proseso sa diin thermometer ang ginagamit kag gina-disinfect lang sa gilayon.
Aminado man ang natungdan nga mas malawig ang proseso.
Ginasunod man sang tagdumalahan ang 50 percent operational capacity nga ginmandu sang otoridad agud malikawan ang pagdinaguso sang mga tawo kag matuman ang physical distancing.
Nahibaluan nga santo sa Administrative Order 2020-002, ginpahayag sang Department of Tourism (DOT) nga ang accommodation establishments kaangay sang hotel, resort, tourist inn, pension house, homestay, kag iban pa nga establishemento nga naga-offer sang kaangay nga serbisyo ang mahimo makabaton sang guests para man sa trabaho ukon leisure SA KONDISYON nga sundon ang 50 percent operational capacity.
