GUIMARAS – Dapat nga ipaiway anay sang mga pumuluyo sa Nueva Valencia, Guimaras ang paglagaw-lagaw kag pag-gwa sa ila balay subong nga may yara pa sang coronavirus disease 2019 (COVID-19) scare.
Sa interview sang Bombo Rayo kay Pol. Lt. Norman Pacifico, hepe sang Nueva Valencia Municipal Police Station, iya ginpahayag nga kooperasyon ang labi nga ginakinahanglan sa subong kag dapat nga sundon sang mga pumuluyo ang mga panugyan kag mandu sang Guimaras Provincial Government.
Sa bahin sang kapulisan, hugot nga ginapatuman ang checkpoint sa mga dalanon, terminal, kag pantalan.
Suno kay Pacifico, kabahin sa ila nga ginapahanumdom sa tanan amo ang simple nga social distancing measure.
Ini nga instruksyon ang ginapatuman man pati sa mga namatyan sa diin, suno sa natungdan, ‘direct family’ lang ang ginatugtan sa balay sa diin nahaya ang patay.
Istrikto nga ginadumulian ang pagsugal kag public viewing.
Nahibaluan man nga una na nga ginpahayag ni Guimaras Governor Samuel Gumarin nga ginpauntat na ang pagpasulod sang mga dumuluong sa probinsya halin sang nagligad nga semana, kag lakip lamang sa ‘exempted’ sa travel kag border restrictions amo ang mga may trabaho, mga naga-deliver sang goods kag ang mga may yara ang Health Declaration Card nga may yara sang importante nga transaksyon.
