Patay ang number one most wanted person sa banwa sang Tigbauan, Iloilo kag ang kaupod sini matapos gin-alegar nagbato sang nagserbe ang mga pulis sang warrant of arrest sa Blue Mountain, Brgy. Sta. Cruz, Antipolo City, Rizal.
Ang subject sang operasyon amo si Reagan Gepulango, residente sang Brgy. Guisian, Tigbauan, Iloilo.
Santo sa official report sang Philippine National Police (PNP), ginpahayag nga sang buot nga magsulod sa puertahan sang ila hideout ang Anti Kidnapping Group-Luzon Field Unit, nagpalupok ang subject kag bilang self-defense, nagbalos man ang mga pulis nga amo ang rason sang kamatayon ni Gepulango kag sang isa niya ka kaupod nga tubtob subong wala pa nakilal-an.
Matapos ang encounter sa tunga sang subject kag otoridad, narecover sang mga pulis sa balay nga ginatiniran sang subject ang tatlo ka handguns nga may mga bala kag isa ka sachet sang suspected shabu.
Sa interview sang Bombo Radyo kay Police Captain Roy Castro, hepe sang Tigbauan Municipal Police Station, iya ginpahayag nga santo sa record, si Gepulango ang subject sang anum tanan ka warrants of arrest nga amo ang Carnapping, paglapas sa RA 9516 nga may kaangtanan sa illegal kag unlawful possession sang firearms and explosives, kag paglapas sa gun ban sang Commission on Elections (COMELEC).
Ang tatlo ka nasambit nga warrants of arrest ang gin-isyu ni Honorable Judge Daniel Antonio Gerardo S. Amular sang RTC Branch 35 sa Ramon Q. Avanceña Hall of Justice sang Pebrero 9, 2021.
Subject man si Gepulango sang warrants of arrest bangud sang Attempted Homicide, Attempted Murder, kag Murder gamit ang wala sang lisensya nga armas-luthang.
Ginapahayag nga ang ginpatay ni Gepulango amo si Jose Lego sang tinalikdan nga Abril 26, 2012 sa Sitio Tina-an, Parara Norte, Tigbauan, Iloilo.
Suno pa kay Castro, si Gepulango ang ginapahayag katapo sang Gepulango Group nga aktibo anay sa banwa sang Tigbauan kag may mga impormasyon man nga madugay na siya nagapuyo sa Rizal bangud may yara siya sang pamilya didto.
