Naglapaw na sa 5,000 ang ginabanta numero sang casualties sa Libya kasunod sang makamamatay nga baha sa eastern city sang Derna sa amo nga pungsod sa North Africa.
Suno sa International Organization for Migration sang United Nations,10,000 ka mga tawo ang gin-deklarar nga missing kag 30,000 naman ang na-displace.
Nagagutok man ang mga morgue kag ospital sa lawas sang mga biktima.
Kun basehan ang director sang Al-Bayda Medical Center, ginakahangaw-an nga maglapaw sa 20,000 ang patay samtang nagapadayon pa ang search and rescue operations.
Matandaan nga Domingo sang daw kaangay nga tsunami nga baha ang nagluntad sa Derna sang nawasak ang dam samtang nagalaslas si Bagyo Daniel matapos nga naglaslas man sa Greece, Bulgaria kag Turkey.
Sa subong, padayon pa ang monitoring sang Department of Foreign Affairs (DFA) kun may mga Pinoy nga apektado sang pagbaha.
Suno kay Foreign Affairs spokesperson Teresita Daza, wala pa sang reported nga napatay apang padayon pa nga gina-kontak ang mga Filipinos bangud may 1,100 ka mga Pinoy sa Eastern Libya kag sa sini nga numero, 90 ang naga-istar sa lugar nga natam-an gid sang naglabay ang bagyo.
