ILOILO CITY- Nagpanawagan ang isa sa mga founding members sang National Union of People’s Lawyer (NUPL) kay First Lady Atty. Liza Marcos nga magpakita ini sang delicadeza may kaangtanan sa iya pagtudlo bilang part-time professor sa West Visayas State University(WVSU)-College of Law.
Sa interview sang Bombo Radyo kay Atty. Jobert Pahilga, iya ginpahayag nga apisar kwalipikado si Marcos, apang dapat talupangdon ang isyu sang moral ascendancy bangud nga nakatapik ini sa pamilya Marcos nga may madamo nga mga kaso kriminal, ilabi pa nga criminal law man ang subject nga itudlo sini.
Suno kay Pahilga, indi man praktikal para sa first lady nga magtudlo sa Iloilo bangud nga maga-require ini sang security detail kag gasto.
(WVSU)
Ginpahayag man sang abogado nga maayo na ang law program sang WVSU kag posible nga mamantsahan pa ini sang negatibo nga imahe sa bangud lang sa kontrobersiya nga dala sang pagtudlo sang first lady.
Suno pa sa iya, makahuluya man sa bahin ni Marcos nga ginaprotestahan siya sang mga estudyante.
Dugang niya, kun luyag gid man ni Marcos nga makabulig sa Iloilo, mahimo niya ipaagi ini sa pag-provide sang social services sa pumuluyo kag indi paagi sa pagtudlo sang criminal law.
