ILOILO CITY- Nagaabiso ang Office of Building Official sang Iloilo City Government sa tanan nga nagapanag-iya sang mga daan nga buildings ukon buildings nga may minimum nga 15- anyos na pasaka nga magpatigayon sang assessment.
Sa interview sang Bombo Radyo kay Engr. Mavi Gustilo, head sang Office of Building Official, iya ginpahayag nga importante ang assessment sa istruktura sa building agud ma-check ang strength capacity sini.
Suno kay Gustilo, kun maggwa sa assessment sang isa ka private structural engineer nga mas manubo sa standards sang national building code ang structure, sunod nga i-rekomendar ang retrofitting.
Dugang niya, katuyuan sini nga mapapag-on ang mga building agud nga makasarang ang mga ini sa tion nga may magluntad nga mabaskog nga linog.
Nahibaluan nga sa Iloilo City makit-an ang madamo nga mga heritage buildings kag ang iban diri ang halos guba na.
