Emosyonal ang isa ka amay sang nagdangop sa Bombo Radyo Iloilo agud magpanawagan sa gobyerno nga usisaon ang makaduluda nga kamatayon sang iya anak nga overseas Filipino worker (OFW) sa Kuwait.
Ang napatay amo si Gary, 39, residente sang Barangay Balud, Tobias Fornier, Antique, kag naga-trabaho bilang family driver sa amo nga pungsod sa Middle East.
Sa interview sang Bombo Radyo sa amay nga si Julie Garcia, iya ginpahayag nga ulihi sila naka-istorya sang iya bata sang Hulyo 3 sang gab-i kun sa diin nagapanugid pa ini sang ila indi paghangpanay sang iya employer.
Lakip sa nemensyonar sini nga rason amo ang pagpangakig sang amo bangud sa cellphone.
Ginapahayag man nga indi ini pagpasugtan nga magpauli sa Pilipinas bangud sa Septyembre pa magatakop ang iya kontrata.
Suno kay Julie, ginpasalig niya sa iya anak nga kadtuan sini ang Overseas Workers Welfare Administration (OWWA) para ma-address ang problema.
Amo na lang ang kakibot sini nga pagkasunod nga adlaw, ginbalita na sa pamilya nga napatay ang iya bata bangud ginaalegar nga nag-utas sang kabuhi.
Indi mahim-os ang amay bangud sang ginpamangkot sini ang Filipino nga kaupod man ni Gary, nagaduko lang ini kag indi man magpanugid.
Gindugang sini nga gusto lang niya mausisa kun ano gid man ang matuod nga natabo sa iya bata bangud pag-abot sang bangkay sini sa Antique, nakit-an sini nga may yupok na ang kamot, may pila ka pilas sa agtang, kay “unidentified” ang resulta sang autopsy sa bahin sang National Bureau of Investigation.
“Gusto ko maklaruhan kag maimbestigaran sang maayo kun ano gid ang natabo. Pirme gid ko gahibi kag galain buot ko,” suno sa amay. “Emosyonal ko kay bisan ang apo ko gadamgo gid sa iya. Gulpi sa napatay. Kun kis-a gakatulog ko, gapangayo siya sang bulig sa akon… ‘Papa, buligi ko.’ Te syempre, Tatay ako mo… gusto ko gid maliwanagan,” pahayag pa sini samtang nagahibi.
Nagalaum ang pamilya nga makalab-ot kay President Ferdinand Marcos Jr. kag OWWA ang ila nga panawagan.#
