Samtang amat-amat na nga mabatyagan ang epekto sang El Niño phenomenon, ginmanduan naman ni Philippine National Police (PNP) chief Gen. Benjamin Acorda Jr. ang mga unit sang kapulisan nga pabaskugon pa ang operasyon batok sa kinawatay sang tubig.
Suno kay Acorda, handa ang pulis nga magsuporta sa mga water companies nga imbestigaran ang mga kaso sang water pilferage.
Bilang organisasyon suno sa iya, may zero-tolerance policy ang mga pulis sa sini nga iligal nga mga aktibidad sa tubig.
“Even during times of El Niño, our existing policies on energy and water conservation remain in place. We will intensify these efforts to ensure that our resources are used wisely,” suno pa kay Acorda.
Magluwas sa pag-address sa problema sa kinawatay sang tubig halin sa fire hydrants kag mayor nga water lines, ginmanduan man ni Acorda ang mga regional offices — ilabi na ang yara sa mga area nga may minahan — nga pabaskugon pa ang tikang batok sa iresponsable nga pagmina kag iligal nga pagpang-utod sang kahoy.
Dapat tapnaon suno kay Acorda ang tanan nga aktibidad nga nagaamot sa pagkaguba sang palibot nga amo man ang nagapalala sang mga problema nga naangot sa El Niño.
“We must work together to protect our environment and conserve our natural resources,” dugang sang PNP chief.
Nahibaluan nga base sa pinakaulihi nga datos sang Department of Agriculture (DA), nagsaka na sa P357.4 million ang halit sa crop sector as of February 24 bangud sa tuman ka init nga tyempo.
Lakip sa nalista nga pinakaapektado sini nga phenomenon amo ang mga mangunguma sa Ilocos, Mimaropa (Mindoro, Marinduque, Romblon, and Palawan), Western Visayas, kag Zamboanga Peninsula.#
