ILOILO – Gamiton sang Iloilo Provincial Government ang Operation Bulig Ilonggo agud mabuligan pa ang mga Overseas Filipino Wokers (OFWs) nga yara sa mga pungsod nga apektado sang Novel Coronavirus.
Sa interview sang Bombo Radyo kay Governor Arthur Defensor Jr., iya ginpahayag nga sa subong, ginahitso na ang sulat sa mga mga national agencies kaangay sang Department of Foreign Affairs (DFA), Overseas Workers Welfare Administration (OWWA), Department of Labor and Employment (DOLE) kag Philippine Overseas Employment Administration (POEA) agud labi pa nga mapasanyog ang bulig para sa mga OFWs.
Nahibaluan nga ang Operation Bulig Ilonggo ang ginpatuman subong nga Enero sa bulig sang Public Employment Service Office (PESO) bilang lead agency, agud malab-ot ang mga Ilonggo sa Middle East nga naipit sa tensyon sa tunga sang Iran kag Estados Unidos.
Nauna man nga ginpahayag ni Defensor nga luyag niya nga mangin permanente na ang amo nga proyekto agud mas madamo ang mabuligan nga OFWs kaangot sa ila nanuhay-tuhay nga mga problema.
Sa subong, ginatinguhaan nga mahibaluan kun pila ka Pilipino ang yara sa Wuhan, China, ang epicenter sang Novel Coronavirus kag sa mga kaiping nga lugar.
Samtang, kaangot sa posibilidad nga makasulod na ang Novel Coronavirus, ginpahayag ni Defensor nga nakaistorya na siya kay Provincial Health Office Head Dr. Patricia Grace Trabado kun ano ang mga kinahanglanon.
Ginpasalig man sang opisyal nga on-stanby ang mga ambulansya gikan sa 12 ka mga hospital sa probinsya nga handa magbulig sa Bureau of Quarantine sa tion nga may pasyente nga makabatyag sang sintomas sang Novel Coronavirus.
May ginapatigayon man nga information and education campaign ang Provincial Health Office kaangot sa pagpabilin sang proper hygiene kag katinlo.
