ILOILO CITY- Nagpaandam ang isa ka public health expert may kaangtanan sa paggamit sang molnupiravir bilang oral treatment batok sa COVID-19.
Sa interview sang Bombo Radyo kay Dr. Philip Ian Padilla, Microbiology Professor kag Vice- Chancellor for Academic Affairs sa University of the Philippines (UP) Visayas, iya ginpahayag nga apisar nga may yara ini sang Emergency Use Authorization(EUA) halin sa Food and Drug Administration(FDA), indi pa ini mahimo gamiton sa iban nga COVID-19 patients kaangay sang bata kag nagabusong.
Suno kay Padilla, dapat nga adult lang ang hatagan sini partikular ang mga non-severe COVID-19 patients nga may pinakamataas nga risgo sang hospitalization kaangay sang mga tawo nga wala mahatagan sang COVID-19 vaccination, mga tigulang, nga tawo nga may immunodeficiencies kag mga tawo nga may chronic diseases.
Suno kay Padilla, may yara man ini sang side effect kaangay sang paglingin sang ulo kag diarrhea.
Pahayag niya, base sa clinical studies, may dala ini nga toxicity gani padayon pa ini nga ginatun-an sang maayo.
Ang molnupiravir nga isa ka oral tablet ang ginahatag bilang apat ka tablets sa sulod sang lima ka adlaw.
Napamatud-an man nga kun matumar ini sang temprano matapos ang infection, makabulig ini agud malikawan ang hospitalization.
