ILOILO CITY- Pasado na first reading sa Iloilo City Council ang ordinansa nga nagadugang sang 850 ka mga bag-o nga loading kag unloading areas para sa Public Utility Vehicles sa syudad.
Ini may kaangtanan sa implementasyon sang Enhanced Local Public Transport Route Plan.
Sa interview sang Bombo Radyo kay Councilor Atty. Sedfrey Cabaluna, chairman sang Committee on Transportation, iya ginpahayag nga tuyo niya nga mapasar na ini nga ordinansa sa 2nd and final reading bangud pila ka bulan naman nga ginatutukan ini sang technical working group antes pa man ang implementasyon sang bag-o nga route plan sa syudad.
Suno kay Cabaluna, apisar nga ang iban nga areas ang wala pa sang signages, ginapadasig naman ini kag sakop sini ang tanan nga distrito sa syudad.
Pahayag pa ni Cabaluna, importante ini nga ordinansa bangud ini ang mangin basehan sang mga loading kag unloading areas para sa mga depampasahero nga salakyan kag makapangdakop ang Traffic Management Unit sang mga violators.
Siguraduhon naman sang konsehal nga kun mapasar na, striktuhan ang implementasyon sini para sa matawhay nga hulag sang mga salakyan sa dalanon.
