Napasar na sang Iloilo City Council ang ordinansa nga nagapahanugot sa pagpasirado sang area kun sa diin magasugod ang pagplastar sang contractor sa relocation site para sa mga vendors nga apektado sa rehabilitation sang La Paz Public Market.
Sa interview sang Bombo Radyo kay Councilor Ely Estante, chairman sang Committee on Engineering, Construction, and Public Works, partikular niya nga ginplastar ang paghatag sang kiosko para sa mga eateries.
Suno kay Estante, 28 ka stalls ang i-provide para diri kag may kadakuon lang nga 2.4 meters by 2.5 meters agud mapaigo ang tanan.
Pahayag ni Estante, ang Local Economic Enterprise Office (LEEO) ang in-charge sa pag-identify kun sin-o ang i-assign sa sini nga mga kiosko.
Dugang ni Estante, ang pag-provide sang kuryente sa mga kiosko ang mangin katungdanan na sang contractor nga F. Gurrea Construction, Inc. apang ang Task Force Asis ang maga-assist sa pagpatakod.
Sa bahin sang tubig, patakdan man sang linya para sa ila samtang ang drainage para sa ginagamit nga tubig sang mga eateries ang ginaplanuhan man kun diin iplastar.
Dumilian naman ang pagluto sa eatery kun wala sang fire extinguisher gani ginarekomendar nga luto na nga daan nga dal-on ang mga baligya agud mas convenient.
