ILOILO CITY- Nagpangabay ang organizer sang kontrobersyal nga Juan Ride 2023 sa tanan nga participants nga naugot bangud sa alegasyon nga scam ang amo nga event nga indi pag-umiron sa ila kaugot kag kaakig ang pila ka mga grupo kag indibidwal nga nag- intra man sa event.
Sa interview sang Bombo Radyo kay Eduardo Retazo, Business Development Director sang Creative Smart Ideas Events and Mktg Co., iya ginpahayag nga ila ginaako ang tanan nga responsibilidad kag wala sang kahilabtanan ang iban nga suno sa iya nagbulig lang sa pagfacilitate agud magdamo ang participants.
Pila sa ginpangalanan ni Retazo nga indi dapat pag-umiron sa isyu amo ang Supreme Brotherhood Charities, Inc., kag mangin ang tag-iya sang isa ka kalan-an sa Mulley Loney nga ginapanag-iyahan sang vlogger nga si Levy Quinto sa diin nagserbe nga headquarters ang amo nga establishment.
Kaangot sini, ginhangkat ni Retazo ang sin-o man nga magpasaka na lang sang kaso batok sa ila kag ila ini atubangon.
Nagpaandam naman ini sa mga grupo sang riders nga nagaharass sa ila nga indi sila magpangduha- duha nga magpasaka man sang kaso.
Una na nga ginpanginwala sang organizer ang alegasyon sang mga grupo sang mga motorcycle riders nga isa ka scam ang nasambit nga event kag ghost winners ang mga nagdalaug sang premyo nga mga motorsiklo sa ginpatigayon nga raffle draw bangud tubtob subong, wala pa sang nag-surface bisan isa ka tagdaug sa raffle.
