Nagsaka na sa 95 ang pinakaulihi nga narekord nga COVID-19 cases sa Oton, Iloilo.
Sa interview sang Bombo Radyo kay Mr. Jafet Salinas, focal person sa Oton, Iloilo, iya ginpahayag nga bangud sini, hugot ang pagpatuman sang amo nga banwa sang tanan nga health protocol.
Suno kay Salinas, ginapangdakop man ang mga wala nagasuksok sang facemask.
Samtang, ginpaidalom naman sa surgical lockdown ang portion sang mga barangay sa:
- Abilay;
- Buray;
- Tagbac; kag
- Poblacion West
Ginpahayag ni Salinas nga sa tion nga may latnanay sang COVID-19 sa sulod sang isa ka panimalay, ginapakamaayo nga ipaidalom ang mga ini sa istrikto nga home quarantine.
Padayon naman ang hingyo sang natungdan sa mga pumuluyo sang Oton, Iloilo nga magsunod sa tanan nga health protocol agud malikawan ang makahalangawa nga COVID-19.
