ILOILO CITY – Madasig ang pagpadalagan sang driver sang sports car rason nga nabunggu-an-patay ang mag-asawa sa Diversion Road, Mandurriao, Iloilo City.
Sa interview sang Bombo Radyo kay Police Staff Sergeant Rey Amihan, imbestigador sang Mandurriao Police Station, iya ginpahayag nga nag-overtake ang sports car nga ginamaneho ni June Paul Rufino Valencia, 32, sa isa puti nga pick-up nga ginamaneho ni Allan Calunsod.
Bangud nga madasig ang pagpadalagan sang sports car, wala na nakalikaw si Valencia kag nabunggu-an ang mag-asawa.
Ginpahayag ni Amihan nga mismo si Calunsod pa ang naglagas sa sports car agud nga pasungkaon sa otoridad ang driver.
Sang yara na sa police station, ginpahayag ni Amihan nga gin-ako man ni Valencia nga iya nabunggu-an ang mag-asawa.
