Ginpaathag sang Iloilo City Government nga prayoridad ang edukasyon sa P300-million nga utangon sang syudad halin sa Development Bank of the Philippines.
Ini ang i-pain para sa expansion sang Iloilo City Community College (ICCC) nga ginaplano nga tukuron sa Barangay Concepcion-Montes, Fort San Pedro, City Proper.
Sa interview sang Bombo Radyo kay Joy Fantilaga-Gorzal, ang spokesperson ni Mayor Raisa Treñas, iya ginpahayag nga paagi sa pagpasangkad sang amo nga eskwelahan, mabuksan ang ganhaan para sa mg pigado apang deserving nga mga Ilonggo nga makapadayon sa pag-eskwela.
Igatanyag man suno sa iya ang in-demand nga mga programa kaangay sang Information Technology, Hotel and Restaurant Management, kag iban pa nga mga programa kun sa diin madamo nga trabaho ang nagahulat.
“The expansion of ICCC at Fort San Pedro will open doors to more indigent but deserving Ilonggo students diri sa aton syudad – nga isa guid sa aton priorities – ang edukasyon,” kabahin sang post sang alkalde.
“Ini nga proyekto amo gid ang rason kun ngaa mapadayon naton ang libre nga tuition kag miscellaneous fees para sa aton mga pigado apang deserving nga estudyante. Kun wala ini, madamo sa ila ang wala na sang iban pa nga pilian – kundi mauntat nalang sa pag-eskwela,” dugang sini.
Ginpatpat man sini ang paga-ubrahon sa ginaduso nga expansion sang ICCC.
Ini nagalakip sang site development; duha units sang tatlo ka panalgan nga building nga may 12 ka classrooms; kag isa ka unit sang apat ka panalgan nga building nga may walo ka classroom.
Gamiton man ang pondo para sa dalan kag parking spaces sa sulod sang campus; drainage system; pader; kag gymnasium nga may 1,000 nga seating capacity kun ilakip na pati ang court.
Nahibaluan nga kun maaprubahan ang utang, ini ang mangin una nga loan sa idalom sang administrasyon ni Mayor Raisa Treñas.
Sang Myerkules, naghatag sang awtoridad ang Iloilo City Council sa alkalde agud nga mapirmahan ang amo nga loan agreement.#
Photo: Raisa Treñas/FB
