ILOILO CITY- Posible nga madayon na gid ang ginaduso nga P450 nga minimum wage sang mamumugon sa Western Visayas kasunod sang rekomendasyon sang Regional Tripartite Wage and Productivity Board (RTWPB)-6.
Sa interview sang Bombo Radyo kay RTWPB-6 chair kag Department of Labor and Employment (DOLE)-6 regional director Atty. Sixto Rodriguez, iya ginpahayag nga halin sa P395 nga minimum wage,maduganga ini sang P55 kag ginakabig nga pinakadako nga wage increase sa rehiyon.
Suno kay Rodriguez,ang sakop sang P450 minimum wage increase amo ang non-agricultural, industrial kag commercial sector nga may yara sang masobra sa 10 ka empleyado.
Apang sa mga sektor nga may empleyado nga mas manubo sa 10 ka mga empleyado, ang increase yara sa P420.
Nahibaluan ang Western Visayas ang pinakauna pinakauna nga rehiyon sa pungsod nga nakapasa sang wage increase sa National Wage and Productivity Commission (NWPC) para sa review kag approval.
Matandaan nga nagfile ang FISHTA Union of Employees for reforms Through Solidarity Actions (FUERSA-SUPER) sang wage increase bangud nga 2019 pa sang ulihi nga may ginpatuman nga pagpataas sang sweldo sa rehiyon.
Gin-athag naman ni Rodriguez nga kinahanglan pa nga aprubahan sang National Wages and Productivity Commission (NWPC) ang rekomendasyon sang RTWPB-6 nga wage increase kag i-publish sa isa ka regional newspaper sa sulod sang 15 ka adlaw.
Target nga maumpisahan ang pagpatuman sang P450 nga minimum wage sa palaabuton nga Hunyo 12, 2022.
