ILOILO CITY- Gin-aprobahan sang Iloilo City Council subong nga adlaw ang Supplemental Budget No.1 nga nagabalor sang ₱452, 471,299.02.
Sa interview sang Bombo Radyo kay Miss Viminale Capulso, head sang City Budget Office, iya ginpahayag nga kabahin sa amo nga supplemental budget ang general fund kag special account sang Local Economic Enterprise Office.
Dako nga porsyon sini ang magakadto sa infrastructure projects kag Maintenance and Other Operating Expenses.
Nalakip man diri ang ginpataas nga uniform allowance sang mga regular nga empleyado nga P7,000 halin sa P6,000.
Diri man nasulod ang ginpataasan sa P2,000 nga bulanan nga representation and transportation allowance sang department heads kag assistant department heads kun sa diin mangin P19,000 na ang batunon sang department heads halin sa P17,000 samtang halin sa P15,000 mangin P17,000 ang batunon sang asst. department heads.
Ginpainan man sang budget sa idalom sini ang tatlo ka bag-o nga opisina nga ginalakipan sang Personnel Information and Payroll System Management, Data Assessment and System Management Office, kag Local Economic Development and Investment Promotion.
Diri man kuhaon ang P30 pesos nga dugang sa sweldo kada adlaw kun sa diin mangin P480 na ini halin sa P450.
